【台中北屯】【食記】樂座爐端燒 崇德店
本帖最後由 doris 於 2017-10-19 11:51 編輯【台中北屯】【食記】樂座爐端燒崇德店，用船槳送餐，真係好似係日本咁呀！
店名：樂座爐端燒 RAKUZA Robatayaki 崇德店地址：台中市北屯區崇德路二段206號
營業時間： 17:30–00:00
用餐日期：2017年10月
電話：042241 0896
今日小肥妹就帶左啲香港朋友子黎食好西，呢間係我屋企人都強烈推薦，有濃烈日本風味嘅爐端燒餐廳，都可以叫係「居酒屋」。
佢以前都有間熱河店但而家就已經改左唔係爐端燒，同埋小肥妹不嬲都係食開祟德店，
因為一來新啲環境靚啲，係咁嘅環境下食野都好食啲啦！
其實祟德路都係台中最近發展嘅區域黎，因為熟台中嘅都知好多大餐廳都開係公益路，
但而家好多出名嘅餐廳都陸續開分店係祟德路上，可能係貪佢地方大又就腳啦。
所以，覓食嘅香港人不妨可以轉移下陣地去祟德商圈食好西。
睇下個環境先
小肥妹強烈建議大家真係要Book位，咁今次我係Book吧枱位，
因為吧枱位先有船槳送餐呢個特色，如果坐樓上卡位就會變左好似普通食日本野咁架喇。
以下比餐牌大家參考下，你會發現用呢個價錢係香港根本食唔到爐端燒！
同埋呢間爐端燒好特別嘅係仲有生勾勾(壽司、刺身)可以食，我呢啲港女最鍾意就食生勾勾架喇！
居酒屋不在乎最重要就係「酒」，但唔飲酒嘅都有其他選擇，我覺得呢邊燒酒種類都算多同埋都ok幾好飲。
我地今日都有叫，港女朋友一嘅就有飲梅酒同柚子酒，梅酒我地都覺得好飲，但柚子酒就有少少伏，好似食中個苦嘅柚咁。
咁當日唔飲得酒嘅港男朋友就嗌左支綠茶味嘅可樂，我同港女朋友都有偷偷地試左少少，我地兩個都覺得好伏，
但港男朋友又覺得接受到喎，所以你話口味呢啲野真係見仁見智。
所以小肥妹不嬲都話如果你食到啲唔好食嘅野，你千其唔好話難食，你最多就可以話唔岩你胃口，因為可能果樣野都有另外一啲人好鍾意食覺得好好味呢～
因為時間關係我地已經叫左超多野食，首先就介紹呢個蜆蜆先，個名就叫「鮮炒海蛤蜊」NT260，
兩位港人朋友都表示係香港係無可能用呢個價錢食到呢個份量同呢個質素嘅炒蜆蜆。
呢個其實我之前已經嗌過幾多次，因為本人老豆次次黎親都要食呢個炒蜆蜆，話非常好食咁話。
大家可以睇下啲蜆蜆係好肥美同個份量都算多，仲有上面啲蔥真係畫龍點精，幾個三朋好友食一碟，感情先會好架嘛。
跟住就到我非常鐘意嘅一夜干，登登登登登。
今日我問左個店員呢條係午魚，一夜干其實都有幾多款，基本上都係用鯖魚、竹筴魚、花魚、黃魚、午魚。
咁大家可能好好奇咩叫一夜干呢，好多日本餐廳都會見到架噃，一夜干其實係指將鮮魚處理好之後，用鹽水醃，再風乾一晚，通常日本餐廳之後再用黎燒。
你可能聽到咁嘅處理手法會心諗：嘩，咁咪好似食魚乾咁。
咁你就大錯特錯，通常用黎整一夜干嘅魚都係魚油魚脂非常之豐富，所以食落去都係好嫩滑多汁。
我個人就偏向鍾意黃魚同午魚所做成嘅「嚴選自製一夜干」NT 360 ，同埋我覺得樂座呢條真係不得了，
我覺得真係食左會有驚喜果隻，所以我都好推薦大家可以嗌呢條魚。
然後我地今日就嗌左唔算多嘅壽司，因為原來其實兩位友人都唔係好食生勾勾，咁我唯有食埋佢地果份啦。
我今次就有叫「灸比目魚緣側」、「灸花枝」、「生花枝」同埋「牡丹蝦」，因為今日我想食嘅海膽同帶子都無，所以就無嗌好多。我覺得呢度啲壽司係算好食，但只係款式比較少，可能無你鍾意食果款。
而友人因為就係無佢想食果啲壽司，就嗌左個「鰻魚丼飯」NT 195黎食下，佢表示都OK幾肥美，同個汁都唔會太甜岩岩好。
而「現煎玉子燒卷壽司」NT 150 ，你以為佢係普通甜蛋啦，但其實佢唔係，佢真係同我地平時食果啲玉子燒包落壽司度，
所以一舊都幾大舊，個嘴無我咁大都唔可以一口食晒呀！友人亦都表示呢個熱辣辣真係幾好食。
咁我偶爾都要做下健康嘅小朋友，所以我地都有嗌蔬菜類。
爐端燒呢蔬菜類真係考功夫，因為出面好多燒蔬菜都會燒得好乾，一係就啲汁同調味加好多，你根本就食唔出蔬菜本身嘅味道。
而樂座嘅蔬菜類都好新鮮而且都算幾多選擇，跟住燒出黎都唔會係乾爭爭果啲，所以都幾好食。
我地今日就叫左「四季豆」NT 80 、「絲瓜」NT 80、「芥末青椒」NT 120。
之後我就要講下我地都覺得一般般嘅野食。
當天個店員就不停推銷我地叫呢個「澎湖現撈生蠔」NT 360，餐牌上無嘅，
咁我地就諗住新鮮就試下啦，黎到見啲蠔無我咁肥已經覺得好似伏伏地。
跟住食落去真係麻麻地，好淡味，無咩蠔味又無咩鹹味咁，
側邊仲有一堆無味嘅海帶，嗯，係完全無味嘅。
所以呢個其實我地有少少失望，因為係店員推薦，點知中晒店員伏嘅感覺。
港女友人就叫左呢個「芥末明太子雞翼」NT 270 ，咁我地三個人就叫三隻啦。嗯，就好一般無咩特別。
最後甜品方面我地叫左個「燒麻糬」NT 80，點知佢原來係鹹嘅同埋我地覺得有少少乾。
總括黎講小肥妹我真係幾鍾意呢間餐廳「樂座」，所以都想推薦比我大家去試下，等大家係台中都可以體驗下日本氣息啦！
店名：樂座爐端燒 RAKUZA Robatayaki 崇德店(有收加一服務費)地址：台中市北屯區崇德路二段206號
營業時間： 17:30–00:00
用餐日期：2017年10月
電話： 04 2241 0896
頁:
[1]