點解要到台灣讀大學？
本帖最後由 samlam 於 2017-10-19 15:20 編輯點解要到台灣讀大學？
僑生最常被問到嘅問題就係：點解你要黎台灣讀大學？
香港學位不足好簡單首先第一個條件就係我上唔到香港嘅大學先啦。 香港人最鐘意就係「爭」。
由BB開始爭PlayGroup、爭幼稚園、爭小學、爭中學，由細爭到大，有幾多人先爭到呢張「大學入場卷」呢？
香港一年有七萬幾個應屆考生考DSE，但其實只有18%考到入大學，其他地方都無香港咁難入大學，歐美有超過五成嘅升學率，
而台灣更加係差唔多個個有大學讀。達到「33222」升讀香港八大院校嘅最低門檻其實唔難，
難嘅係達到嘅人遠多過大學所提供嘅學位。
香港大學學位，供不應求。
學費問題
第二，就係錢嘅問題。
由於升學率低，香港政府為左滿足學位需要，就比啲大學開設自費嘅大專課程，
而家好多爭唔到大學學位而經濟能力有返咁上下嘅學生，都會選擇報呢啲自費課程黎讀，例如副學士同高級文憑，自費課程一年學費大約六萬至十一萬港幣，唔少學生升學果時都會申請學業貸款，以自費課程嘅大專生黎講，畢業果時要揹超過十九萬嘅債，大專生畢業走入社會，又輸大學生，最多都係萬鬆啲人工，唔食唔飲唔生活，都要年幾先還得晒條數。而台灣大學學費，睇下公立定私立，一年大約一萬五到四萬港幣左右，加上生活雜費亦比香港低好多，所以好多人都會選擇比仔女去台灣升學，起碼都叫讀過下「大學」。
選科多元化
第三，選科問題。如果你同一個香港人講你想讀「藝術」或者「設計」文憑，第一句就會比人話「無前途」、「搵唔到工」等等潑冷水嘅話。因為香港藝術氛圍差，對藝術品、設計師尊重低，之前有篇South China MorningPost嘅新聞係話，
香港市民去Art Basel好似去遊樂場咁，大人會摸油畫，
細路仔更加會跳上藝術品上面，嚇驚左好多國際畫廊。http://www.scmp.com/news/hong-kong/education-community/article/1931376/hong-kong-art-basel-it-was-way-too-much-fun係學習藝術方面，香港本地藝術教育不足，學生同老師都對藝術無咩熱情，亦都無咩發展空間同原創性。而台灣黎講，你唔可以話讀藝術係最好，但起碼老師同學生都係有心，亦好堅持原創性，
台灣有濃厚嘅文化氣息，仲有對文創產業嘅重視，
而且如果你係中南部讀嘅話，地方夠大，有足夠空間創作。加上選科選擇多，你可以主攻你其中一樣最有興趣嘅去讀。
黎台發展藝術創作的確係個唔錯嘅選擇。
遠離香港教育體制
第四，逃離香港？相信最近「移民台灣」都算係一個熱門嘅話題。
好多人對香港有種種不滿、生活壓力大，
但投資移民又唔可以太過草率決定，因為如果你無足夠認識台灣嘅話，可能過到黎唔係你想像中咁。到時候花左咁多時間、錢、心機搞投資移民，
先發覺其實自己唔係咁適合係台灣生活，咁咪棧搵野黎搞～而我都係覺得係香港由細爭到大嘅教育制度對我黎講太吃力，可能我都係「藝術家性格」啦，鍾意自由創作唔受環境限制。所以選擇係台灣升學，或者派子女黎台灣升學視察下環境，可能都算係個唔錯嘅選擇。
現實與幻想
如果你係香港無辦法升大學，黎台灣讀個學位做跳板，
之後再到外國繼續升學都係個唔錯嘅方法。或者你係想拎個碩士學位，揀台灣讀亦相對比較輕鬆。
你可能好鍾意台灣嘅人情味、生活水平同環境，但我建議你係決定黎台灣之前，諗清楚你嘅目的同計劃。你可能睇過好多香港人移居台灣嘅新聞，
但我可以話比你知，後悔嘅人亦都有好多。
黎台灣生活唔同去旅行，反而係人生規劃嘅其中一種，
所以係做決定之前，真係需要好好考慮清楚。因為現實與幻想，始終都有差別。
頁:
[1]