台灣Call的士小秘訣

係台灣除左好熱鬧嘅地方之外，有時真係好難截到的士，非鬧區要搵的士可以有以下呢幾個方法：

打電話call車
手機打:55688係台灣大車隊；55178係大都會計程車；5510係泛亞車隊，好處係只要有手機就可以call車，缺點係如果唔知自已係邊或者國語唔好，就好容易同司機雞同鴨講。

用 Call 的士 App
常用Call的士app有台灣大車隊、大都會計程車，好處係有GPS定位叫車，唔洗同司機雞同鴨講，只要手機有signal，download左個app就可以用，但缺點係GPS有時會唔準，如果你真係人生路不熟，唔知原來GPS標錯位，司機去錯地點見你唔到仍然會打比你。都係果句，如果唔知自已係邊或者國語唔好嘅，最終又係同個司機雞同鴨講。所以call的士app亦非萬無一失。

搵人幫手叫車
一般中高檔餐廳（唔係路邊攤或小店）都有幫手叫車嘅服務，食完飯同櫃台講要叫計程車，佢叫完車會同你講架車幾時會到同埋車號（唔係車牌號碼，係車號，一般車號會印係的士車身或印係車頂個會發光的士標誌上，好易認），如果你係住有管理員嘅社區（係香港叫屋苑），可以出門口時同管理員講你要叫的士，佢叫完車就會同你講架車幾時到同埋車號。好處係唔洗同call台雞同鴨講，叫管理員call車嘅話，一般社區管理員都會留記錄，所以比較唔會搵到啲變態司機，好適合單身女仔叫車時採用。缺點係唔適用於非中高檔餐廳食完野或者無管理員嘅社區要call車嘅時候。

便利店call車
台灣便利店真係開到附近總有一間，要叫車去7-11/family mart，禁ibon/famiport部機叫車，操作完會印張紙仔比你，會印住架車幾耐度會來同埋車號，跟住就可以出門口等車。好處係唔會出現用call車app時GPS標錯位嘅情況。但缺點係要搵到便利店先得，如果附近都無便利店就無計啦！

搭的士要先準備好詳細地址
係香港好多時候同的士司機講要去邊用大廈或屋苑名就OK，但係台灣坐的士時最好先查清楚要去嘅目的地地址，試過好多次講咩咩大廈或屋苑司機就會問「是那條路？門牌幾號？」，最後只好google 查完地址再同司機講，所以後來都會先查好地址再上車。