唔知各位媽咪有無聽過「胎神」呢？我自己就對胎神感觸良多。

話說我懷孕六個月之前都係台灣待產，而我上一篇都講過，我夫家係十分之傳統嘅家庭黎。
而我待產嘅地方正正都係個鳥不生蛋嘅山頭，方圓百里連7-11都無，
然後上山落山都係無辦法用行嘅，亦都無車可以搭，
所以對我一個唔識交通工具嘅大肚婆黎講，真係好似坐監咁。

然後自從我有左之後，我夫家屋企所有人就不停用「胎神」洗我腦。
原來台灣人嘅傳統習俗係話，當你有左BB到生完之後100日，就會衍生一個胎神，
去保護BB係媽咪個肚入面健康長大。

而呢個胎神係屋企係無處不在嘅，亦都有可能附係任何一啲野上面。

 
所以佢地覺得胎神同大肚婆係住係同一個空間，所以大肚婆住緊果間房同屋唔可以有任何異動，
否則就會觸動到胎神，進而影響到肚入邊嘅BB。

而大肚嘅禁忌實在太多喇，而我夫家又特別迷信，
例如唔可以郁房入邊任何一啲野，連個床單都唔可以換，
因為話咁樣會郁到張床，張床有個床母就代表個肚咁話。
然後又唔比我剪指甲，話唔可以剪任何野，唔係個BB出世就會有缺陷之類，
其實我最後都無聽到佢地講照剪，因為唔剪指甲真係好辛苦。

跟住我覺得最過份嘅係唔比我煮野，因為日頭晏晝都係無人係屋企，但又住荒山野嶺。
咁我早午餐就無辦法自己煮野，只可以食乾糧類，夜晚先可以叫老公買外賣返黎食。
所以頭六個月我由72公斤跌到54公斤。
就一來無營養無熱量，二來我又食唔慣，食咩都嘔，仲要一直比佢地逼我拜呢樣拜果樣。

 
我最深刻嘅就係果陣咁岩過年，半夜比佢地全家人拖起身去「拜天公」，
我果時一嚇醒，嘔得好嚴重，但佢地堅持捉我起身去拜天公。
我話唔拜，佢地就捉我手去拎香話一定要拜，由半夜拜到朝早七點。
我果時真係覺得委屈到爆，想買機票第二日就走。

所以到六個月果時，我真係頂唔順返機票返香港待產，
即刻就肥返，變返個正常人。

所以話台灣傳統嘅習俗信念，真係唔係個個香港人都接受到架。