店家資訊： 瞞著爹(台中精誠丼飯店) 

店家地址：台中市西區精誠九街23號 (係巷仔入面)

店家電話：04-37048955 (現場等位，唔接受訂位)

營業時間：11:30~15:00   17:00~22:00 

                             (15:00-17:00係店家嘅休息時間)

店家網站：http://www.manjedad.com/

店家Facebook：https://www.facebook.com/manjedadtachungdon/

用餐時間：2017年09月

備註：每人低消280，現金結帳、服務費10%另計

呢晚隱世小肥妹就黎到呢間新開嘅瞞著爹黎食晚餐，當然我約埋另一個肥妹去食啦。

呢間野８月１８先開始試賣，所以都算係幾新。

同埋瞞著爹本身其實係有一間旗艦店，精誠丼飯只係新開嘅分店，

另外一間係食無菜單料理，價錢大概貴一倍，同埋一定要訂位！

等下次小肥妹出糧先去食比大家睇啦！

以下係瞞著爹精誠丼飯嘅餐牌比大家參考下：

（究極乜乜乜就係圖中果個）

本來我地兩個肥妹係想叫最貴果個究極乜乜乜，即係1480兩人份果個。

點知店家當日無賣，我真係好想食究極乜乜乜呀呀呀呀呀呀呀！

最後我地經過一番討論之後就決定左叫比目魚星鰻丼同明太子軟絲干貝丼，

仲加點左個明太子玉子燒！

解釋一下可能好多香港人都唔知台灣嘅魷魚、透抽、花枝、軟絲係到底有咩分別

從體型大小黎分辨：魷魚＞透抽＞花枝＞軟絲＞小管

咁樣大家就可以知道台灣叫法係代表啲乜野喇！

跟住兩個肥妹就等等等，好快啲魚生飯就上喇，

個玉子燒就要等耐啲。

同埋提提大家係台灣食飯呢，通常都要等待忍耐嘅，

佢地唔會好似香港可以咁快上菜架，

所以去食飯都要體驗下呢邊「慢活」精神。

首先出場嘅係明太子軟絲干貝丼，登登登登登！

頭先已經解釋過軟絲係咩，相信大家已經知道，

咁干貝呢香港有時都會咁叫，即係帶子。

呢個飯上面啲明太子辣辣地加埋酸酸地嘅紫蘇蘿蔔泥，

真係好開胃呀！

我覺得呢間同我其他食過嘅魚生飯有啲唔同嘅係

佢會用多種唔同味嘅食材去配搭，

令到食落去唔會咁單調同味道唔會咁齋，

而且呢個價錢黎講都幾大碗，

但好食程度係小肥妹幾大碗都食得落呀！

跟住好快就上埋比目魚星鰻丼，

比目魚邊邊同星鰻大家應該都唔陌生，

因為我身邊都好多朋友鍾意食比目魚邊邊，

同埋果飯一上，我地兩個肥妹見到比目魚同星鰻鋪滿左成個飯，

內心都非常之澎湃呀！

加埋蔥花同辣辣明太子仲有三文魚子，

呢個配搭都好好食呀，都適合重口味嘅香港人。

明太子玉子燒係我地今日等最耐嘅項目。

但我可以話係值得我一等再等！

熱辣辣嘅玉子燒包住辣辣明太子，玉子燒都好滑，

我覺得仲好食過香港一門。

同埋比起丼飯上面嘅原味玉子燒，

加左明太子同埋熱辣辣嘅觸感真係神來一筆！

如果無去台中嘅香港朋友，其實暪著爹係台北已經有七間分店。

間間都有特色之處，大家都可以去試下。

呢晚我地兩個肥妹都食好飽好滿足。

我地都覺得今次食嘅食材新鮮，口味又岩我地胃口。

感覺我地好快就會食第二次，

我地下次一定要食到究極乜乜乜呀！

所以話黎台灣係一定會變肥！

忘記體重先可以活得開心呀～