香港變成一個陌生嘅地方。

係香港，我總會覺得一切都好急促，地方空間亦都不足，壓力大、填鴨式教育導致香港人面上都有一陣陰霾。對我黎講，雖然香港生活多姿多采，霓虹燈五光十色，但我心目中嘅香港係灰色嘅。

我係個以前係街邊食魚蛋、牛雜、大排檔長大嘅香港人，而家可以搵返呢種「港味」嘅地方愈來愈少，唔係香港人唔再鍾意食大排檔，而係慢慢變晒連鎖店、藥房、名牌集中地。如果你抬頭望望，香港本土市民真係想要呢啲高樓大廈、引黎大批大陸人嘅藥房同名牌？隨著自由行嘅不斷擴張，商舖、房屋嘅租金都被嚴重抬高，有好多出名嘅老鋪同小食舖因為無辦法承受租金上漲壓力，只好退租。如果舊有嘅事物通通消失，我地嘅回憶又係邊呢？

人與人之間因為生活中繁忙亦變得冷漠，香港本來係個非常可愛嘅城市，點解而家變得咁冷漠？你會發現香港人人都係度自己做自己嘅事，大家都活係自己嘅世界。人與人之間嘅氣氛同以前唔同左。我本來以為香港係我嘅家，但我每次返去都覺得愈來愈陌生，但香港始終係我嘅「根」，所以我先會想同大家分享我係台灣嘅一切。

係台灣我搵到我想要嘅生活。

從細到大我對自己嘅座右銘都係「 Be a better man. 」，做一個自己鍾意嘅人，過自己鍾意嘅生活，係呢一點上，台灣好適合我。台灣係個好適合創造生活嘅地方，同時自由度亦好高，無論你係台北、中、南，只要你願意踏出果一步，就會有人同你和應。可能你會想作出啲多人藝術創作、可能你單純係街同陌生人傾計，係台灣你付出嘅，大部分都會得到回報，特別係朋友。

台灣人念舊，對回憶好重視，所以有好多香港人所講嘅「人情味」。呢度嘅人十分願意同其他人認識，同當地人相處其實係好容易，比起警戒心重嘅香港，係呢邊更容易結識到志同道合嘅朋友，但第一步係你自己都係敞開心胸去同佢地交心。係呢度用真誠對待往往比香港來得簡單。

我好想同香港人講，走唔出去，眼前就係你世界；當走出去，世界就係你眼前。你有無諗過，你鍾意過點樣嘅生活？日子可唔可以過得唔一樣？其實你唔洗勉強自己，去過唔鍾意嘅生活。係台灣，我搵到屬於我嘅出口，我揀左一個我可以自己開創嘅世界。或者你嘅生活會比你想像中更精彩都話唔定，呢個世界無你想像中咁複雜，你都係。