成日都有人話台灣係美食天堂, 好多人黎台灣都係為左食, 究竟台灣野食係唔係真係咁正呢?

CNN票選十大美食旅遊點，台灣第一

筆者個人就覺得台灣野食無咩咁特別, 甚至覺得部份台灣食物真係好難食, 今次就同大家分享一下!

豬血糕

好難形容, 又硬又實, 無咩味但係又有點噁心的感覺, 食左一啖就唔想再食落去!

中伏指數: ★★★★☆

蚵仔煎

好地地蠔仔煎蛋+菜，點醬食咪幾好, 係要加一pat鼻涕咁既漿糊落去, 成件事感覺錯晒, 唔加會好好多囉!

中伏指數: ★★★★☆

芋圓

其實即係芋頭、糖同薯粉撈埋一堆整出黎, 一般會同甜湯一齊食, 就咁食係無咩味。

中伏指數: ★★★☆☆

烤玉米

原本鮮嫩多汁的栗米, 係要燒到佢又硬又乾, 仲要燶晒, 完全唔知想點, 簡直係浪費食物!

中伏指數: ★★★★★

貢丸湯

台灣人常飲的湯, 就真係得貢丸、水同少少調味粉, 同煲湯真係差天共地, 連滾湯都不如, 可以用”洗煲水”黎形容。

中伏指數: ★★★☆☆

粄條

台灣的河粉其實叫粄條, 係用台灣米整既, 又粘又軟而且唔滑, 肥肥大大又有點厚, 好似食緊條狀的粉粿皮咁。

中伏指數: ★★★☆☆

平價牛扒

絕大部份都係用重組肉, 即係俗稱”膠水肉”, 係用牛扒肉的邊邊尾尾切出黎, 再用磷酸鹽等化學劑將佢痴埋一舊, 食一塊基本上已經超晒標, 特徵係一煮就散開晒。

中伏指數: ★★★★☆

台灣出名小吃多, 夜市掃街成為遊客必備節目, 如果大家唔怕中伏, 歡迎挑戰一下以上食物!