分享到:

【生活指南一】香港人台灣租屋好頭痛？租屋睇真啲！

2017-11-6 13:54| 發佈者: samlam| 查看: 32096| 評論: 0

摘要: 相信唔少香港人都會有台灣搵屋嘅問題，無論係黎讀書、公幹、移民、投資或者短期旅行都需要租屋。

【生活指南一】香港人台灣租屋好頭痛？租屋睇真啲！

相信唔少香港人都會有台灣搵屋嘅問題，無論係黎讀書、公幹、移民、投資或者短期旅行都需要租屋。台灣一般通常都係一年租約，未夠一年都係叫「短期租約」，而且都有幾多包租公/婆為左唔想住客換黎換去，所以唔接受短期租約。就算有可以短期租約嘅，租金都會比一般貴20%左右。

房屋用詞識幾多？

一開始無論搵租定買果時，你都可能會去上啲房屋網探下路先，例如591房屋交易，睇下你想住果區大概有咩類型嘅樓盤，大概幾錢，多唔多同類型樓盤放租等等。

第一次上啲房屋網，可能你睇到某啲用詞會一頭霧水，唔緊要，等我同你逐一解構：

雅房：簡單啲講即係板間房/劏房，或者係同人地一齊住，要同人共用廁所，同埋空間比較細，當然，價錢都會比套房平。

套房：即係有連個人廁所沖涼房嘅，而大部分都會包埋一啲基本嘅生活傢電，例如床、冷氣、雪櫃、電視、書檯、凳等等，通常房屋網上面都有列明包啲咩野。

樓中樓：一套住宅佔兩個樓層，有內部樓梯。

公寓：即係唐樓，比較舊少少嘅大樓，通常都係無看更同無電梯。

電梯大樓/華廈：有電梯嘅，比較新少少，有看更，有部分仲有會所同垃圾房，所以通常要比管理費。

透天厝/別墅：成棟都係自住，透天厝似村屋，別墅就靚啲可能會有電梯。某啲都會有看更同垃圾房，所以有社區嘅都要比管理費。

住邊區點揀？坪同呎又點分？

台灣都有好多地區，最重要就係你想要啲咩生活環境。例如如果你習慣左香港公共交通方便、熱鬧嘅環境，可能你就會揀台北市區；如果想係熱鬧市區同荒郊平靜之間搵平衡點嘅，可能你就會揀台中；如果係想體驗傳統文化，嚮往古色古香，可能你就會揀高雄/台南；如果想修心養性，享受大自然好山好水好風景，可能你就會揀台東。

台灣每個地方各有特色，會比到你唔同嘅感受。但我建議你決定住邊區前，先了解果區嘅「生活機能」，

咩係「生活機能」呢？

指嘅就係住屋附近一啲有關生活嘅野，例如交通方唔方便，附近有無車站、有無街市、超級市場、醫院、診所、銀行、學校、商場、便利店等等。因為如果你係無車牌無個人交通工具嘅話，就要依賴公共交通工具，住屋附近嘅生活機能就變得好重要。

而香港嘅樓係用「呎」(平方英尺)作為單位，但台灣就係用「坪」。一坪大概係35.6呎。但台灣都有分「建坪」、「實坪」、「虛坪」，就好似香港嘅「實用面積」同「建築面積」嘅分別。「建坪」：所有樓層嘅底板面積加總，包含露台、會所等面積。「實坪」：佔地總面積，不包含露台、騎樓、會所等實際面積。「虛坪」：非私人使用面積、會所面積。