台灣創業好與壞 文：霍志明
其實台灣創業與世界各地一樣，一定有好有壞，台灣嘅好處，當然係成本低，如租金平、人工低，入場容易。 壞處當然係好處的相反，入場門檻低，自然吸引力大，競爭自然大，所以，凡事都一體兩面，既然凡事有好有壞，不如探討下，在台創業嘅創業基本要素啦或稱心理準備！ 記得有本書的名字叫《為什麼1%的人創業賺大錢》，不是吧！1%？100個生意人只有1個成功？雖不中，亦不遠矣，可能更少，不會更多。阿Q，有心理必勝法，但係創業，從來沒有絕對必勝法，尤其是當你人生路不熟，甚至可能係第一次創業嘅時候。 移民台灣，基本上只有3個方法，一是依親，嫁個台男和娶個台妹，有台灣爸爸媽媽或子女；一是專業人士，政府認為你是專業人士就是專業人士；一是投資移民，投資600萬新台幣。唔使問阿貴，唔使搵數據，我可以答你絕大多數香港人只能選擇投資移民。投資移民即是要做生意，究竟做乜生意先算穩陣？你唔嫌嘮叨，我都嫌長氣，現在再重申一次：「天下間哪有必賺無蝕嘅生意？」這句講了不下數千次，有的話，我已經做了。 印象中，創業者需要勇氣和熱血，人們總覺得年輕就是本錢，諷刺嘅係，投資需要資本，資本需要青春累積，累積了足夠嘅資本，青春便已一去不復。可想像，多數新移民已不再是血氣方剛的少男少女，未必願意花心血經營一盤生意，卻又硬著頭皮去做，這樣很可能會不小心「中伏」。講生意經，人人都識，比方說要有好產品、有市場就有價值、凡事親力親為、別怕麻煩等等，但係人生就是解決問題嘅旅程，解決問題嘅最佳辦法就是經歷錯誤和失敗。 弔詭地，台灣政府把「投資+移民」混為一談，儼如細細聲誘惑你魚與熊掌可以兼得，事實是投資和移民係兩回事，別被這個詞語誤導。首先，大前提係做合法嘅生意，別以為這道理像阿媽係女人，就是因為太多人鋌而走險，筆者才不厭其煩提醒大家，生意失敗，損失的東西係可計算嘅；移民失敗，失去的東西係無法衡量嘅。筆者在2013年搞過足球館，那場地是頂讓回來，之前已營運了3年，結果接手後卻被政府封場抄家，欲哭無淚。
伏，無處不在，當時筆者的室內足球場被指與用途不符，原來那是住宅用途，不得用作商業用途，吓？點解前一手可以搞咁耐，呢啲就係台灣政府的執法特色，連土生土長嘅台灣人都會中招，何況係新移民？當時晴天霹靂，幾百萬新台幣投資血本無歸，汲取了一生難忘嘅教訓，當作交學費。江湖傳聞，在台中，七成餐廳係不合法，但係千萬別相信一些移民中介教你哋走後門、行歪路，否則只會悔錯難返。 有朋友在台北開餐廳，僅僅係一台分體式冷氣機，便被要求搬了6、7次不同位置，執法人員只會講「咁樣唔得」，從不會說明「點樣先得」。台灣嘅餐廳，油煙位不可以面對他人住家，這是常識，老友羅伊就試過安裝靜電除油排煙系統，因後巷對住人家的窗戶，被迫移高一點，但再被民居投訴。終於，他把排煙系統移至天台，殊不知又遇上落雨漏水，再有住戶投訴，頭頭尾尾加起來花了100萬新台幣，最終唯有改為面向大街！問你怕未？ |
Facebook請即讚好「樂活台灣網」及加入群組： 移民台灣香港人資訊分享 | 香港人美食旅遊推介
台灣香港人商店： 北部 |
中部 |
南部 |
東部
本站對所有文章的真實性、完整性及立場等，不負任何法律責任。而一切文章內容只代表發文者個人意見，並非本網站之立場。
