移民去或留-永遠都有唔同嘅原因！咁你呢？

點解攞咗身分證就走？！

來台兩年接觸一啲朋友取得身分證後就回流返香港…點解呢？其實每個人都有唔同原因。等我分享比大家聽聽！有啲已經非常清楚自己過嚟台灣嘅目的，只是嚟攞定身分證，等之後才過嚟享受退休生活。 

希望越大失望越大 ！

而當中好多都係美麗嘅誤會，亦可以話「希望越大失望越大」！台灣創業對香港人嚟講成本低，令唔少朋友都充滿憧憬，鼓起勇氣嚟台灣創一番事業！ 但無諗到當中嘅現實，現實就係台灣創業成本低亦都表示台灣人消費模式同香港唔同，我哋點樣可以係一個咁「知慳識儉」嘅市場成功闖一番事業呢？ 

 

港式飲食真係咁易做？

見好多朋友嚟台灣都主要係開港式食店，老實講請問有幾個本來喺香港就已經係做飲食業呢？又幾多個了解台灣人飲食文化呢？ 到最後當然敗走啦… 

因愛成恨 

亦曾經接觸過一啲朋友，佢地由好愛台灣變成憎恨台灣，點解可以咁極端？！就係因為我哋帶咗旅遊心態移民過嚟，覺得所有台灣人都係好人，所有台灣人都好有人情味，覺得台灣人乜嘢都好，有冇可能？ 大家可能忘記咗台灣嘅騙案係最多，諗清楚台灣人受日本文化影響都好大，佢哋嘅性格都會比較有禮貌、客氣、同埋內斂，咁樣係咪代表佢哋好有人情味呢？我覺得佢哋內心深處真係好驚俾人呃先真！哈哈。 

請問今次嚟台灣玩幾日呀？！ 

再嚟就係心態未改，我初初嚟台灣亦都犯了呢個錯誤，但好快我發現左，自己同自己講唔可以咁諗！依一樣就係港紙計算物品的價值（價值觀思維），呢個做法係非常錯誤！我哋依家係移民過嚟喎，唔係去旅行，連最簡單嘅代入角色都未做好點樣將台灣變做自己嘅家呢？